Pedro Sanchez: ప్రపంచం రెండుగా చీలిపోయి, అగ్రరాజ్యాల అడుగులకు మడుగులొత్తుతున్న వేళ.. ఐరోపా ఖండం నడిబొడ్డున ఒక ధిక్కార స్వరం వినిపిస్తోంది. అది శాంతి ముసుగు వేసుకున్న బలహీనత కాదు, యుద్ధోన్మాదాన్ని (Iran War) నిలదీస్తున్న ఒక నైతిక గర్జన! అమెరికా తుపాకీ గొట్టం ముందు మోకరిల్లడానికి నిరాకరించి, “చరిత్ర పునరావృతం కానివ్వను” అని భీష్మించుక కూర్చున్న ఆ నాయకుడే స్పెయిన్ (Spain) ప్రధాని పెడ్రో శాంచెజ్ (Pedro Sanchez). ఐరోపా (Europe) సమాజం మొత్తం ఒకవైపు ఉంటే, శాంచెజ్ మాత్రం ఒంటరి పోరాటం చేస్తూ అంతర్జాతీయ రాజకీయాల్లో ఒక కొత్త ‘నైతిక ధృవతార’గా అవతరిస్తున్నారు.
మార్చి 4: ఒక చారిత్రక ధిక్కారం
మార్చి 2026 నాటికి పశ్చిమ ఆసియాలో యుద్ధ మేఘాలు కమ్ముకున్న వేళ, మార్చి 4న పెడ్రో శాంచెజ్ (Pedro Sanchez) దేశాన్ని ఉద్దేశించి చేసిన 10 నిమిషాల టెలివిజన్ ప్రసంగం అంతర్జాతీయ రాజకీయాల్లో ప్రకంపనలు సృష్టించింది. అమెరికా (America), ఇజ్రాయెల్ (Israel) సంయుక్తంగా ఇరాన్పై (Iran War) జరుపుతున్న సైనిక దాడులను ఆయన కేవలం విమర్శించలేదు, అవి “అంతర్జాతీయ చట్టాల ఉల్లంఘన” (Violation of international law) అని బాహాటంగా ప్రకటించారు. డొనాల్డ్ ట్రంప్ (Donald Trump) స్పెయిన్పై (Spain) వాణిజ్య యుద్ధం ప్రకటిస్తామని బెదిరించినప్పటికీ, శాంచెజ్ తన నిర్ణయానికి కట్టుబడి నిలిచారు.
Pedro Sanchez సిద్ధాంతం: The Three No’s
తన విదేశాంగ విధానాన్ని శాంచెజ్ మూడు పక్కా సూత్రాలతో నిర్వచించారు.
- అంతర్జాతీయ చట్టాల విచ్ఛిన్నానికి ‘నో’: చట్టాలు అందరినీ, ముఖ్యంగా నిస్సహాయ పౌర జనాభాను రక్షించాలనేది ఆయన వాదన.
- బాంబుల పరిష్కారానికి ‘నో’: ప్రపంచ సమస్యలను కేవలం బాంబుల ద్వారానే పరిష్కరించుకోవచ్చనే అహంకారాన్ని ఆయన ప్రశ్నిస్తున్నారు.
- గత తప్పిదాల పునరావృతానికి ‘నో’: ఇది 2003 నాటి ఇరాక్ యుద్ధంపై (Iraq War) ఒక పరోక్ష దాడి. అప్పట్లో ఆ యుద్ధం స్పెయిన్లో ఎంతటి వ్యతిరేకతను మూటగట్టుకుందో గుర్తుచేస్తూ, “No a la guerra” (యుద్ధం వద్దు) అనే నినాదాన్ని ఆయన మళ్లీ ప్రజల్లోకి తీసుకెళ్లారు.
అంకెల్లో సార్వభౌమాధికారం
శాంచెజ్ (Pedro Sanchez) కేవలం మాటలకే పరిమితం కాలేదు, అంకెల్లోనూ తన పట్టు ప్రదర్శించారు.
రక్షణ బడ్జెట్ చెక్: నాటో (NATO) సభ్య దేశాలు తమ జీడీపీలో 5శాతం రక్షణ కోసం వెచ్చించాలని ట్రంప్ హుకుం జారీ చేయగా, శాంచెజ్ మాత్రం అది అసాధ్యమని, స్పెయిన్ కేవలం 2.1శాతం మాత్రమే ఖర్చు చేస్తుందని కుండబద్దలు కొట్టారు.
సైనిక స్థావరాల నిరాకరణ: ఇజ్రాయెల్ (Israel) యుద్ధ యంత్రాంగానికి ఆయుధాలను తరలించేందుకు స్పెయిన్ (Spain) ఓడరేవులను (Ports), గగనతలాన్ని (Air space) వాడకుండా కఠినమైన నిషేధం విధించారు. ఇది ఐరోపాలోని (Europe) ఇతర దేశాలు కలలో కూడా ఊహించలేని నిర్ణయం.
ఇది కూడా చదవండి: North Korea Elections: ప్రపంచంలోనే అతిపెద్ద ‘కామెడీ’ ఎన్నికలు
వలసల విప్లవం: ఐరోపాకు ఎదురీత
ఐరోపా అంతటా వలసదారులపై విద్వేషం, గోడలు పెరుగుతుంటే, శాంచెజ్ (Pedro Sanchez) మాత్రం మానవీయ కోణాన్ని ఎంచుకున్నారు.
5 లక్షల మందికి ఆశ్రయం: జనవరిలో ఆయన ప్రభుత్వం 5 లక్షల మంది అక్రమ వలసదారులకు పని, నివాస అనుమతులు కల్పించింది.
ఆర్థిక ఫలితం: దీనివల్ల స్పెయిన్ (Spain) ప్రస్తుతం ఐరోపాలోనే వేగంగా అభివృద్ధి చెందుతున్న ఆర్థిక వ్యవస్థగా అవతరించింది. దారిద్య్రం, అసమానతలను తగ్గించడంలో అద్భుత ఫలితాలను సాధిస్తోంది. “మనం గోడలు కట్టే మూసివేసిన సమాజం కాదు, అవకాశాలు ఇచ్చే తెరిచిన సమాజం కావాలి” అని ఆయన గర్వంగా ప్రకటించారు.
నీతికోసమా? మనుగడ కోసమా?
విమర్శకులు శాంచెజ్ (Pedro Sanchez) వైఖరిని “స్వార్థపూరిత రాజకీయం” (Self-serving pragmatism) అని కొట్టిపారేస్తున్నారు.
మైనారిటీ మనుగడ: 350 సీట్లు ఉన్న స్పెయిన్ (Spain) పార్లమెంటులో ఆయన ప్రభుత్వం వామపక్ష పార్టీలు, కాటలాన్ వేర్పాటువాదుల మద్దతుపై ఆధారపడి ఉంది. తన ఓటు బ్యాంకును కాపాడుకోవడానికి ఆయన ఈ ‘యాంటీ-ట్రంప్’ (Anti Trump) గళాన్ని వాడుకుంటున్నారని విమర్శలు ఉన్నాయి.
భార్యపై ఆరోపణలు: తన భార్యపై వస్తున్న అవినీతి ఆరోపణల నుండి ప్రజల దృష్టిని మరల్చడానికి ఆయన ఈ అంతర్జాతీయ వేదికను వాడుకుంటున్నారని ప్రత్యర్థి వర్గాలు విమర్శిస్తున్నాయి.
ఒకే ఒక్కడు!
1972లో జన్మించి, 1993లో రాజకీయాల్లోకి వచ్చి, 2018 నుండి ప్రధానిగా కొనసాగుతున్న పెడ్రో శాంచెజ్ (Pedro Sanchez).. నేడు ఐరోపా ఖండానికి ఒక కొత్త దిక్సూచి. జర్మనీ వంటి పెద్ద దేశాల నేతలు అమెరికాను ఒప్పించే పనిలో ఉంటే, శాంచెజ్ మాత్రం “మేము తప్పుకు భాగస్వాములు కాలేము” అని నినదిస్తున్నారు.
ఇది కేవలం ఒక దేశాధినేత నిర్ణయం కాదు; ప్రపంచం యుద్ధ కాంక్షతో రగిలిపోతున్న వేళ, “శాంతి” అనేది బలహీనత కాదు, అదొక బాధ్యత అని చాటిచెప్పే ప్రయత్నం. బలవంతుడి ముందు మోకరిల్లడం కంటే, నైతికతతో తల ఎత్తుకుని నిలబడటమే అసలైన రాజకీయం అని శాంచెజ్ నిరూపిస్తున్నారు.
ప్రశ్న ఒక్కటే: ఈ ఒంటరి పోరాటం శాంచెజ్ను ప్రపంచ స్థాయి నేతగా నిలబెడుతుందా లేక ఏకాకిని చేస్తుందా?
