Saptdhara: 80వ స్వాతంత్ర్య దినోత్సవం వేళ… ఎర్రకోట వేదికగా ప్రధాని నరేంద్ర మోదీ (PM Modi) దేశం ముందు ఒక పక్కా రోడ్మ్యాప్ను ఉంచారు! గత 50-70 ఏళ్లలో సాధించలేకపోయిన లక్ష్యాలను, రాబోయే కేవలం 5 నుంచి 7 ఏళ్లలోనే సాధించాలనే బలమైన సంకల్పం అది. మన ప్రాచీన ‘సప్త సింధు’ నదుల స్ఫూర్తితో.. భారత్ను అగ్రరాజ్యంగా మార్చేందుకు ‘శక్తి కి సప్తధార’ (Saptdhara) పేరుతో ఏడు కీలక రంగాల సరికొత్త వ్యూహాన్ని ప్రకటించారు. 2022లో ప్రకటించిన ‘పంచ ప్రాణ్’ సంకల్పానికి ఇది కొనసాగింపు. అసలు ఈ ‘సప్తధార’లో ఏముంది? ఇది మన దేశ భవిష్యత్తును ఎలా మార్చబోతోంది? పూర్తిగా విశ్లేషిద్దాం.
1. మార్కెట్ స్థాయి నుంచి గ్లోబల్ సప్లయర్
సప్తధారలో మొదటిది, అత్యంత కీలకమైనది తయారీ రంగం (మాన్యుఫ్యాక్చరింగ్). ఇప్పటివరకు భారత్ అంటే ప్రపంచ దేశాల ఉత్పత్తులను అమ్ముకునే ఒక పెద్ద మార్కెట్గా మాత్రమే ఉండేది. కానీ ఆ పరిస్థితి ఇక మారాలి. ధర, క్వాలిటీ, ఉత్పత్తి సామర్థ్యం.. ఈ మూడింటిలోనూ ప్రపంచంతో పోటీపడేలా మన దేశీయ ఉత్పత్తులు ఉండాలని ప్రధాని తేల్చి చెప్పారు. ప్రపంచం తన గురించి తాను ఆలోచిస్తున్న సమయంలో, భారత్ ఇకపై కొనుగోలుదారుగా మాత్రమే కాకుండా ప్రపంచానికి అవసరమైన వస్తువులను అందించే గ్లోబల్ సప్లయర్గా ఎదగడమే దీని అసలు టార్గెట్.
2. పొలం నుంచి గ్లోబల్ మార్కెట్కు వ్యవసాయం
రెండో ధార వ్యవసాయం, ఫుడ్ ప్రాసెసింగ్. వివిధ దేశాలతో జరుగుతున్న స్వేచ్ఛా వాణిజ్య ఒప్పందాల (FTAs) వల్ల మన రైతులకు అంతర్జాతీయ మార్కెట్లు తెరుచుకుంటున్నాయి. అందుకే కేవలం పంట పండించడమే కాకుండా, ‘పొలం నుంచి ఎగుమతి మార్కెట్ దాకా’ వ్యవసాయాన్ని తీసుకెళ్లాలన్నది ప్రణాళిక. భారతీయ సుగంధ ద్రవ్యాలు, మిల్లెట్స్, మన సంప్రదాయ వంటకాలు, పండ్లు, పూలు ప్రపంచవ్యాప్తంగా గుర్తింపు పొందేలా గ్లోబల్ బ్రాండ్లుగా నిలబెట్టేందుకు రంగం సిద్ధమవుతోంది.
3. ఏఐ నుంచి స్వదేశీ 6G దాకా టెక్నాలజీ జోరు
మూడో ధార టెక్నాలజీ, ఇన్నోవేషన్. ప్రస్తుతం ప్రపంచం మొత్తం ఆర్టిఫిషియల్ ఇంటెలిజెన్స్, క్వాంటం టెక్నాలజీ, స్పేస్, రోబోటిక్స్, డేటా సెంటర్ల చుట్టూ తిరుగుతోంది. ఇందులో భారత్ కేవలం ఇతరులను ఫాలో అవ్వడం కాదు, ప్రపంచానికే ఆవిష్కరణల అడ్డాగా మారాలి. ఇప్పటికే మనం యూపీఐ, డిజిటల్ పబ్లిక్ ఇన్ఫ్రాస్ట్రక్చర్తో సత్తా చాటాం. ఇప్పుడు ఆ టెక్నాలజీలను ప్రపంచ దేశాలకు తీసుకెళ్లడంతో పాటు, దేశంలోని ప్రతి మారుమూల ప్రాంతానికీ చేరేలా సొంత పరిజ్ఞానంతో కూడిన ‘మేడ్-ఇన్-ఇండియా 6G’ నెట్వర్క్ను తీసుకురావడమే ప్రధాన లక్ష్యం.
4. హైస్పీడ్ కనెక్టివిటీతో గతిశక్తి & లాజిస్టిక్స్
నాలుగో ధార ‘గతిశక్తి’. దేశం వేగంగా ఎదగాలంటే రవాణా వ్యవస్థ అంతే వేగంగా ఉండాలి. నగరాలను కలుపుతూ హైస్పీడ్ రైల్ కనెక్టివిటీని తీసుకురావడం, తీర ప్రాంతాలను పారిశ్రామిక కేంద్రాలుగా మార్చే పోర్ట్ ఆధారిత అభివృద్ధిని వేగవంతం చేయడం దీని ముఖ్య ఉద్దేశం. అడ్డంకులు లేని హైస్పీడ్ కనెక్టివిటీ ద్వారా రవాణా ఖర్చులు, సమయం తగ్గించి దేశ ఆర్థిక వ్యవస్థకు కొత్త వేగాన్ని ఇవ్వడమే గతిశక్తి లక్ష్యం.
5. రక్షణ రంగంలో సరికొత్త శక్తిగా ‘రక్షా శక్తి’
ఐదో ధార దేశ రక్షణ స్వావలంబనకు సంబంధించిన ‘రక్షా శక్తి’. ఇతర దేశాల నుంచి ఆయుధాలు కొనుగోలు చేసే స్థాయి నుంచి, ఇతర దేశాలకే రక్షణ పరికరాలను ఎగుమతి చేసే ప్రధాన సరఫరాదారుగా భారత్ మారాలని మోదీ పిలుపునిచ్చారు. అంతేకాదు, సాంప్రదాయ ఆయుధాలకే పరిమితం కాకుండా, హైపర్సోనిక్ సిస్టమ్స్ లాంటి భవిష్యత్ తరం డిఫెన్స్ టెక్నాలజీలలో భారత్ గ్లోబల్ లీడర్గా ఎదగాలన్నది అసలు వ్యూహం.
6. పర్యావరణం, సముద్ర సంపదతో కొత్త ఆర్థిక మార్గాలు
ఆరో ధార గ్రీన్ అండ్ బ్లూ ఎకానమీ. గ్రీన్ హైడ్రోజన్, పునరుత్పాదక ఇంధనం, ఎనర్జీ స్టోరేజ్ రంగాల్లో ప్రపంచ సమస్యలకు భారత్ పరిష్కారాలు చూపుతూ లీడర్గా ఎదగాలి. అలాగే మనకున్న సుదీర్ఘ తీర ప్రాంతం ద్వారా మత్స్య సంపద, తీర ప్రాంత పర్యాటకం, ఓషన్ టెక్నాలజీలను ఉపయోగించుకుని సరికొత్త ఆర్థిక వనరులను సృష్టించాలన్నది బ్లూ ఎకానమీ లక్ష్యం.
ఇది కూడా చదవండి: Kids Mental Health: పిల్లల మనస్సులతో ఆట.. మెటాకు రూ.8,967 కోట్ల జరిమానా!
7. ప్రపంచాన్ని కనెక్ట్ చేస్తున్న భారత ‘సాఫ్ట్ పవర్’
చివరిగా ఏడో ధార మన దేశ ‘సాఫ్ట్ పవర్’. యోగా, ఆయుర్వేదం, సంపూర్ణ జీవన విధానం, పర్యాటకం, మన సంస్కృతి ద్వారా అంతర్జాతీయంగా భారత్పై నమ్మకం, గౌరవం గణనీయంగా పెరిగాయి. యోగా ఇప్పటికే ప్రపంచాన్ని భారత్తో ఎలా ముడివేసిందో చూస్తున్నాం. ఈ బలాన్ని మరింత ముందుకు తీసుకెళ్తూ, దేశ యువత నైపుణ్యాలను పూర్తిస్థాయిలో జాతి నిర్మాణానికి ఉపయోగించడమే ఈ సప్తధారల (Saptdhara) అంతిమ ఉద్దేశం.
2047 నాటికి ‘వికసిత భారత్’ సాధించాలనే మహా సంకల్పంలో రాబోయే 5 నుంచి 7 ఏళ్లు అత్యంత కీలకం కానున్నాయి. మరి ఎర్రకోట (Red Fort) సాక్షిగా మొదలైన ఈ ‘శక్తి కి సప్తధార’ ప్రవాహం, భారతదేశాన్ని ప్రపంచంలోనే అత్యున్నత శిఖరాలకు ఎలా తీసుకెళ్తుందో చూడాలి!
