డొనాల్డ్‌ ట్రంప్ ముంచేశారు. ఆయన ముంచనిది ఎవరిని అనకండి.. తమను నమ్ముకుని రష్యాతో యుద్ధాన్ని లాగలేక లాగుతున్న ఉక్రెయిన్‌ను నడిసంద్రంలో ముంచేశారు. న్యాయం చేస్తారని అనుకుంటే అన్యాయంగా దిక్కుతోచని స్థితిలో వదిలేయడమే కాదు…ఇప్పుడు ఏకంగా బెదిరింపులకు దిగారు. గుట్టుచప్పుడు కాకుండా రష్యాకు అనుకూలంగా పీస్‌ డీల్ రెడీ చేయడమే కాకుండా ఇప్పుడు సంతకం పెడతావా చస్తావా అంటూ ఉక్రెయిన్ మెడపై మిస్సైల్‌ పెట్టారు…!
ఉక్రెయిన్ ఇన్నాళ్లూ పోరాడింది రష్యా దురాక్రమణను అడ్డుకోవడానికే…తన భూభాగాన్ని కాపాడుకోవడానికే… కానీ ఇప్పుడు రష్యా ఆక్రమించిన తన దేశంలోని కొన్ని ప్రాంతాలను ఇప్పుడు శాశ్వతంగా కోల్పోవాల్సిన పరిస్థితి వచ్చింది. ఇన్నాళ్లూ ఏ అమెరికానైతే నమ్ముకుని జెలెన్‌స్కీ తనకన్నా వందరెట్లు బలమైన రష్యాను ఢీకొట్టాడో ఇప్పుడు అదే అమెరికా అతడ్ని నిండా ముంచింది. యుద్ధం ఆపేందుకు రష్యా లేటెస్ట్‌గా తయారుచేసిన పీస్‌ అగ్రిమెంట్‌ ఉక్రెయిన్‌ను వెన్నుపోటు పొడిచేలా ఉంది. పూర్తిగా రష్యాకు అనుకూలంగా దీన్ని తయారుచేసింది వైట్హౌస్. ఇప్పుడు దానిపై సంతకం పెట్టాలని కీవ్‌పై ఒత్తిడి తెస్తోంది. వెనక్కు తగ్గకపోతే ఇంటెలిజెన్స్, ఆయుధ సాయం ఆపేస్తామని హెచ్చరిస్తున్నారు ట్రంప్. అమెరికా వెనక్కు తగ్గితే మిగిలిన దేశాలు కూడా అదే బాటలో నడుస్తాయి. అదే జరిగితే ఉక్రెయిన్ పూర్తిగా మునిగిపోయినట్లే… యుద్ధంలో వేలమంది ఉక్రెనియన్లు చేసిన ప్రాణత్యాగం వృథానేనా… ఇన్ని లక్షల కోట్ల ఆస్తి నష్టం ఎవరికోసం అన్న ప్రశ్నలు రేగుతున్నాయి.
ట్రంప్ ప్లాన్‌లో ఏముంది..?
ఉక్రెయిన్, రష్యా యుద్ధం అంతానికి 28సూత్రాలతో ట్రంప్ మాస్టర్‌ప్లాన్‌ సిద్ధం చేసినట్లు తెలుస్తోంది. అధికారికంగా దీనిపై ఎలాంటి ప్రకటనా లేకున్నా వైట్హౌస్ మాత్రం తెరవెనక చేయాల్సిందంతా చేస్తోంది. పుతిన్ సన్నిహితులతో కలిసి దీన్ని సిద్ధం చేయడంతో అది పూర్తిగా రష్యాకు అనుకూలంగా ఉందని చెబుతున్నారు. ఉక్రెయిన్ దీన్ని వ్యతిరేకిస్తోంది. యూరోప్ దేశాలు కూడా పెదవి విరుస్తున్నాయి. కానీ ట్రంప్ మాత్రం తన పీస్‌ప్లాన్ అద్భుతం అన్నట్లు కలరింగ్ ఇస్తున్నారు. ఇంతకీ ఈ ప్లాన్‌లో ఏముందంటే….
⦁ డాన్‌బాస్‌లో రష్యా నియంత్రణలో ఉన్న ప్రాంతాన్ని ఆ దేశానికే అప్పగించాలి
⦁ ఆ ప్రాంతంలోని మిగిలిన భూభాగాన్ని కూడా ఉక్రెయిన్ వదులుకోవాలి
⦁ లుషాంక్, క్రిమియా, డొనెట్స్క్‌ ప్రాంతాలు పూర్తిగా రష్యా అధీనంలోకి వెళతాయి.
⦁ ఉక్రెయిన్‌లో 20శాతం భూభాగం రష్యా అధీనంలో ఉంది. రష్యా దళాలు నెమ్మదిగా ముందుకు చొచ్చుకొస్తున్నాయి. వారు అడుగుపెట్టిన భాగమంతా ఇక వారిదే.
⦁ అమెరికా సైనిక సహకారాన్ని ఉక్రెయిన్ వదులుకోవాలి
⦁ ఉక్రెయిన్ గడ్డపై విదేశీ బలగాలను అనుమతించకూడదు
⦁ రష్యా భూభాగంలోకి దాడిచేయగల స్థాయి ఆయుధాలను ఎవరూ ఉక్రెయిన్‌కు అందించకూడదు
⦁ ఉక్రెయిన్ తన సైనిక బలాన్ని సగానికి తగ్గించుకోవాలి
⦁ ఉక్రెయిన్ ఎట్టి పరిస్థితుల్లోనూ నాటోలో చేరకూడదు
ఈ ఒప్పందం అమలైతే ఏం జరుగుతుంది..?
⦁ ఉక్రెయిన్ సార్వభూమత్వాన్ని కోల్పోతోంది.
⦁ ఇన్నాళ్లూ చేసిన యుద్ధానికి విలువ లేకుండా పోతుంది
⦁ రష్యా, ఉక్రెయిన్, యూరోప్ మధ్య ఒప్పందం కుదురుతుంది. 30 ఏళ్లుగా సెటిల్‌ కాని వివాదాలు సెటిలవుతాయి.
⦁ అమెరికా మధ్యవర్తిత్వంలో రష్యా, నాటో మధ్య చర్చలు జరుగుతాయి.
⦁ రష్యా ఇతర దేశాలపైకి దండెత్తకూడదు. నాటో విస్తరించకూడదు
⦁ నాటోలో ఉక్రెయిన్‌కు ఎట్టి పరిస్థితుల్లోనూ సభ్యత్వం ఇవ్వకూడదు. నాటో దళాలు అక్కడ ఉండకూడదు.
⦁ ఉక్రెయిన్ సైన్యం 6లక్షలకు పరిమితం అవుతుంది.
⦁ ఉక్రెయిన్ భద్రతకు కొన్ని గ్యారెంటీలు ఇస్తారు. అందుకుగాను అమెరికాకు కొంత మొత్తం చెల్లించాల్సి ఉంటుంది.
⦁ ఉక్రెయిన్ రష్యాపై దాడికి దిగితే ఆ గ్యారెంటీ కోల్పోతుంది.
⦁ రష్యా తిరిగి ఉక్రెయిన్‌పై దాడి చేస్తే మళ్లీ ఆంక్షలు విధిస్తారు.
⦁ ఉక్రెయిన్ పునర్నిర్మాణానికి కావాల్సిన సాయాన్ని ప్రపంచదేశాలు అందిస్తాయి. వరల్డ్‌బ్యాంక్ ప్రత్యేక నిధిని కేటాయిస్తుంది.
⦁ రష్యాపై ఆంక్షలు తొలగిపోతాయి. ఇతర దేశాలతో పూర్వంలా స్వేచ్ఛగా వాణిజ్యం చేసుకోవచ్చు.
⦁ ప్రపంచదేశాలు ఫ్రీజ్‌ చేసిన రష్యా అకౌంట్లు తిరిగి తెరుచుకుంటాయి.
⦁ వందరోజుల్లో ఉక్రెయిన్‌లో ఎన్నికలు జరపాలి.
ఈ పీస్‌ ప్లాన్‌ చాలా దారుణంగా ఉందన్నది ఉక్రెయిన్ వాదన. తమ ప్రాంతాలను రష్యాకు ఎలా వదులుకుంటామని ఆ దేశం ప్రశ్నిస్తోంది. తమ అభ్యంతరాలు అమెరికాకు తెలియచేస్తామని ఉక్రెయిన్ అధ్యక్షుడు జెలెన్‌స్కీ చెప్పుకొచ్చారు. తమ సార్వభౌమత్వం విషయంలో రాజీపడేది లేదన్నారు. కానీ పరిస్థితులు పూర్తిగా వారికి వ్యతిరేకంగా ఉన్నాయి. అమెరికా కూడా రష్యా వైపే మొగ్గు చూపుతుండటంతో పీస్‌ప్లాన్‌కు ఒప్పుకోక తప్పని పరిస్థితి. మహా అయితే ఒకటి రెండు అంశాల్లో అమెరికాను ఒప్పించవచ్చు. ఇప్పుడు శాంతి ఒప్పందానికి ఒప్పుకోకపోతే ఉక్రెయిన్ పూర్తిగా నాశనమవుతుంది. ఒప్పుకుంటే ఇన్నాళ్లూ చేసిన పోరాటం వృథా అవుతుంది. దీంతో జెలెన్‌స్కీ డోలాయమానంలో ఉన్నారు. అలాగే శాంతి ఒప్పందం అమల్లోకి వచ్చిన వందరోజుల్లోగా ఎన్నికలు జరపాలి. అంటే ఓ రకంగా జెలెన్‌స్కీని ఇంటికి పంపించాలన్నది రష్యా ఉద్దేశంగా కనిపిస్తోంది. ఇందుకు అమెరికా కూడా సముఖంగానే ఉంది. యూరోప్ కూడా అమెరికా ప్లాన్‌పై అసంతృప్తిగా ఉంది. కానీ దాని అభ్యంతరాలను అమెరికా పట్టించుకునే అవకాశాల్లేవ్. మొత్తంగా చూస్తే ఉక్రెయిన్‌కు ముందు నుయ్యి, వెనక గొయ్యి అన్నట్లుంది సిట్యుయేషన్.
నోబెల్‌ను వదలని ట్రంప్…
ఇప్పటికే అన్ని యుద్ధాలు ఆపాను, ఇన్ని ఆపాను అని ట్రంప్ చెప్పుకుంటున్నారు. ఈ ఏడాదే నోబెల్‌ శాంతి బహుమతి వస్తుందని ఆయన ఆశించి భంగపడ్డారు. వచ్చే ఏడాది ఎలాగైనా నోబెల్‌ను ముద్దాడాలన్నది ఆయన ఆశ. అందుకే సాధ్యమైనంత త్వరగా ఉక్రెయిన్ యుద్ధాన్ని ముగించాలని భావిస్తున్నారు. వచ్చే ఏడాది ఫస్ట్‌ పార్ట్‌లోనే నోబెల్‌ పీస్‌ ప్రైజ్ నామినేషన్లు ముగుస్తాయి. కాబట్టి ఈసారి స్ట్రాంగ్‌గా ప్రయత్నించాలన్నది ఆయన ఉద్దేశం. అందుకోసం ఉక్రెయిన్‌ను నిండా ముంచడానికి కూడా సై అంటున్నారు.
