స్టాక్‌మార్కెట్లు భారీ లాభాల్లో కొనసాగుతున్నాయి. ఆ మధ్య కొన్నాళ్లు ఒడిదుడుకులకు లోనైనా ఇప్పుడు బుల్స్‌ ఒళ్లు విరుచుకుని పరుగులు పెడుతున్నాయి. అప్పుడప్పుడు కాస్త రెస్ట్‌ తీసుకున్నా బుల్రన్ మాత్రం ఓ రేంజ్‌లో ఉంది. స్టాక్‌మార్కెట్లు లాభాల్లో ఉన్నాయి కానీ ఇది నాణేనికి ఓవైపు మాత్రమే… మార్కెట్‌లో అందరు మదుపరులు లాభాలు పొందలేకపోతున్నారు. లాభాలు కొందరికి… నష్టాలు మాత్రం ఎక్కువమందికి… ఇదో విచిత్ర పరిస్థితి. మార్కెట్లు పెరుగుతున్నా మేమెందుకు నష్టపోతున్నాం అన్నవారి కోసమే ఈ ఆర్టికల్….
మార్కెట్లు భారీ లాభాల్లో ఉన్నా చాలామంది మదుపరులు ఇంకా నష్టాల్లోనే ఉన్నారు. ఇందుకు కారణమేంటన్నది చూస్తే ర్యాలీ నారోనెస్‌, స్మాల్‌క్యాప్‌ స్టాక్స్‌ రీటైల్ ఎక్స్‌పోజర్‌ ఎక్కువగా ఉండటం ఇందుకు కారణమంటున్నారు నిపుణులు. నిజానికి ఈ వారం నిఫ్టీ, సెన్సెక్స్‌ సాధించిన రికార్డులు కేవలం కొన్ని స్టాక్స్‌ ర్యాలీ వల్ల మాత్రమేనంటున్నారు ఎక్స్‌పర్ట్స్‌. బ్యాంకింగ్‌, కొన్ని ఐటీ, FMCG షేర్లే మార్కెట్‌ను డ్రైవ్‌ చేశాయి. అంటే మిగిలిన షేర్లు అంతగా పెర్ఫార్మ్‌ చేయలేదు. ఇంకా చెప్పాలంటే మార్కెట్లు గరిష్టాల్లో ఉన్నా… చాలామంది రీటైల్ ఇన్వెస్టర్లు… ముఖ్యంగా కోవిడ్ తర్వాత మార్కెట్‌లోకి ఎంట్రీ ఇచ్చిన వారిలో మెజారిటీ పోర్ట్‌ఫోలియో లాస్‌లోనే ఉంది. పైకి పిక్చర్ అంతా క్లియర్‌గా ఉన్నట్లే కనిపిస్తుంది. మార్కెట్లు లాభాల్లో ఉన్నాయి. షేర్లలో ర్యాలీ ఉంది ప్రతి ఒక్కరు లాభాల్లో ఉన్నారన్న భ్రమను మార్కెట్లు క్రియేట్ చేస్తాయి. హెడ్‌లైన్‌ ఇండెక్స్‌ కింద అసలేం జరుగుతుందో తెలుసుకుంటేనే అసలు కారణాలు వెలుగులోకి వస్తాయి. కొద్దిమందే ఎలా డబ్బు చేసుకుంటున్నారు మిగిలిన వారు ఎందుకు నష్టపోతున్నారన్నది అర్థం అవుతుంది.
స్మాల్‌క్యాప్స్‌పై మోజు ముంచేసిందా…?
ఎక్కువమంది రీటైల్ ఇన్వెస్టర్లు స్మాల్‌క్యాప్స్‌నే ఎక్కువగా నమ్ముకోవడం ఈ పరిస్థితికి కారణమన్నది ఓ విశ్లేషణ. వాల్యుయేషన్‌తో సంబంధం లేకుండా స్మాల్‌క్యాప్స్‌ భారీగా రిటర్న్స్‌ ఇస్తాయన్న భ్రమలో ఎక్కువమంది ఇన్వెస్టర్లు ఉండటం వల్లే వారి పోర్ట్‌ఫోలియోలు నష్టాల్లోనే ఉన్నాయని చెబుతున్నారు. అలాగని ప్రతి స్మాల్‌క్యాప్‌ నష్టాల్లో ఉందని కాదు. కానీ ప్రస్తుత ర్యాలీలో స్మాల్‌క్యాప్స్‌ పాత్ర పరిమితం. గత గరిష్టాలతో పోల్చితే నిఫ్టీ స్మాల్‌క్యాప్‌ ఇంకా 9శాతం తక్కువగానే ఉంది. తక్కువ ఆదాయ వృద్ధి, ఫండమెంటల్ వాల్యూ కంటే చాలా స్టాక్స్‌ వాల్యుయేషన్ అధికంగా ఉండటం ఇందుకు ఓ కారణం. నిపుణుల అంచనాల ప్రకారం షార్ట్‌టర్మ్‌, మీడియం టర్మ్‌లో స్మాల్‌క్యాప్స్‌ అద్భుతాలు చేస్తాయనుకోవడం అత్యాశే. ఈ పరిస్థితుల్లో తమ హెవీ పోర్ట్‌ఫోలియోల్లో కొంత భాగాన్ని మంచి వృద్ధికి అవకాశం ఉన్న లార్జ్‌క్యాప్స్‌, మిడ్‌ క్యాప్స్‌ వైపు మళ్లించకపోతే నష్టాల్లోంచి బయటపడటం కష్టమని సూచిస్తున్నారు.
లెక్కలు ఏం చెబుతున్నాయ్…?
ఏడాది కాలంలో చూస్తే మార్కెట్‌ క్యాపిటలైజేషన్ ప్రకారం టాప్ 750 స్టాక్స్‌ను తీసుకుంటే అందులో 252 స్టాక్స్‌ మాత్రమే లాభాల్లో ఉన్నాయి. మిగిలినవాటిలో 464 రెడ్‌లోనే ఉన్నాయి. అంటే అవి పోర్ట్‌ఫోలియోలో ఉంటే నష్టాల్లో ఉన్నట్లే.. అవే పూర్తిగా పోర్ట్‌ ఫోలియోల్లో ఉంటే మొత్తంగా లాస్‌లో ఉన్నట్లే. అలాగే గత ఏడాదిలో 268 స్టాక్స్‌ ఏకంగా 20శాతానికి పైగా పడిపోయాయి. 117 మాత్రమే 20శాతం వరకు పెరిగాయి. దీన్నిబట్టి చూస్తే కేవలం మూడో వంతు మాత్రమే లాభాల్లో ఉన్నాయి. మిగిలిన వాటిలో పెట్టుబడి పెట్టినవారికి నష్టాలే.
మరి మార్కెట్‌లేమో పెరుగుతున్నాయి. కానీ స్టాక్స్‌ మాత్రం నష్టాల్లో ఉన్నాయేంటి అన్న ప్రశ్న వస్తుంది. కానీ నిఫ్టీ దూకుడుకు కారణం కేవలం కొన్ని హెవీవెయిట్స్‌ మాత్రమే. నిఫ్టీ ఆల్‌టైమ్‌ హైని టచ్‌ చేసిన ఇదే సమయంలో నిఫ్టీ మైక్రోక్యాప్‌ 250 దాదాపు 10శాతం, నిఫ్టీ స్మాల్‌క్యాప్‌ 250 దాదాపు 9శాతం తమ గత రికార్డుల కంటే దిగువన ఉన్నాయి. అంటే ఇవి పెరగలేదు. కానీ నిఫ్టీ కేవలం కొన్ని బిగ్‌ షేర్స్‌ వల్ల పెరిగింది. అంటే హెవీవెయిట్స్‌ ఉన్నవాళ్లే లాభపడ్డారు. స్మాల్‌క్యాప్స్‌లో ఇన్వెస్ట్‌ చేసిన వారు నష్టపోయారు. స్మాల్‌క్యాప్‌ మరీ ఔట్‌సైజ్ కావడం ఇందుకు కారణం. అందుకే ర్యాలీలో ఈ షేర్లు మంచి పనితీరు చూపలేకపోతున్నాయి.
మరి వీరి పోర్ట్‌ఫోలియోలు లాభాల్లోకి రావాలంటే ఏం జరగాలి అంటే బుల్రన్ కేవలం కొన్ని స్టాక్స్‌కే పరిమితం కాకూడదు. అన్ని సెక్టార్లకు అన్ని మార్కెట్‌ క్యాప్స్‌కు ర్యాలీ విస్తరించాలి. కానీ ఇది జరుగుతుందా అంటే కాస్త కష్టమే… గత ఆరు క్వార్టర్లుగా స్టాక్‌మార్కెట్లు ఒడిదుడుకులు ఎదుర్కొంటున్నాయి. ప్రస్తుతం రీబౌండ్ దశలో ఉన్నాయి. మరిప్పుడు చిన్న ఇన్వెస్టర్లు ఏం చేయాలన్న ప్రశ్న వస్తుంది. నిపుణుల సలహా ప్రకారం పోర్ట్‌ఫోలియోను రీడిఫైన్ చేసుకోవాల్సిందే. పూర్తిగా స్మాల్‌క్యాప్స్‌పై ఆధారపడటం తగ్గించాలి. లార్జ్‌క్యాప్స్‌, మిడ్‌క్యాప్స్‌వైపు కూడా కొంత పెట్టుబడిని మళ్లించాలి. అప్పుడే కొంతమేర లాభాలను అర్జించే అవకాశం ఉంది.
మార్కెట్లు రానున్న రోజుల్లో మరిన్ని గరిష్టాలను అందుకుంటాయన్నది నిపుణుల అంచనా. ఈ పరిస్థితుల్లో పెట్టుబడిదారులు చాలా జాగ్రత్తగా ఉండాలని సూచిస్తున్నారు. స్టాక్‌ సెలక్షన్‌ సరిగా లేకపోతే పూర్తిగా మునిగిపోతారని హెచ్చరిస్తున్నారు. గరిష్టాల్లో ఉన్నప్పుడు ప్రాఫిట్ బుకింగ్ వంటివి సహజం. ఇలాంటి పరిస్థితుల్లో కాస్త తెలివిగా వ్యవహరించాలి. ప్రస్తుత ర్యాలీ పూర్తిగా మూమెంటమ్‌ మాత్రమేనని గుర్తుంచుకోవాలి. మన స్టాక్‌ సెలక్షన్‌ అద్భుతం అన్న భ్రమల్లోంచి బయటకు రావాలని నిపుణులు అంటున్నారు. ఈ ఓవర్‌ కాన్ఫిడెన్స్‌ ముంచేస్తుందని హెచ్చరిస్తున్నారు. మార్కెట్లు భారీ రికార్డుల్లో ఉన్నాయి కదా అని ఏ షేర్‌లో పడితే అందులో పెట్టడం సరికాదంటున్నారు. ఎవరో చెప్పారని ముందూ వెనకా చూడకుండా దిగడం మంచిది కాదని హెచ్చరిస్తున్నారు. అలాగే స్టాప్‌లాస్‌ను ఫాలో కావడం కంపల్సరీ.
మార్కెట్లకు దూరంగా ఉన్నకొంత మంది ఇప్పుడు హడావుడిగా మళ్లీ ఎంటర్‌ అవడం అనేది ఇలాంటి ర్యాలీల సమయంలో జరుగుతుంది. ఇది మంచిది కాదని నిపుణులు హెచ్చరిస్తున్నారు. మార్కెట్‌లోకి ఎప్పుడు ఎంటరవ్వాలి ఎప్పుడు ఎగ్జిట్ అవ్వాలి అన్నది తెలిస్తే మన పెట్టుబడికి ఎలాంటి ఢోకా ఉండదన్నది ఓ ఫండమెంటల్ సూత్రం.
మార్కెట్లు భారీ లాభాల నుంచి వెనక్కు మళ్లుతున్నాయని గుర్తించిన వెంటనే బయటకు రావడం మంచిదని హెచ్చరిస్తున్నారు. వాల్యుయేషన్స్‌ మరీ ఎక్కువగా ఉన్నాయని భావిస్తే కొంతమేర ప్రాఫిట్ బుకింగ్ అన్నది తెలివైన నిర్ణయం అంటున్నారు. పునాది కాస్త బలంగా ఉన్న షేర్లనే నమ్ముకుంటే స్వల్పకాలంలో ఒడిదుడుకులు ఎదురైనా భవిష్యత్తులో మంచిలాభాలు కళ్లచూడొచ్చన్నది నిపుణుల సూచన.
వీళ్లతో జాగ్రత్త…!
టిప్స్‌ ఇస్తాం అంటూ వాట్సప్‌ల్లో వచ్చే సందేశాలను నమ్మవద్దని హెచ్చరిస్తున్నారు. గ్యారెంటీడ్ మల్టీ బ్యాగర్స్‌, గ్యారెంటీడ్ అప్‌ మూవ్స్‌ అంటూ ఆకర్షణీయంగా వచ్చే మెసేజ్‌లను నమ్మితే నష్టాలు తప్పవు. వాళ్లు చెప్పిన స్టాక్‌ పెరిగితే తమ క్రెడిట్‌గా, నష్టపోతే మార్కెట్‌ ఫ్లక్చ్యుయేషన్స్‌గా చెబుతారు. కాబట్టి ఇలాంటి వారిపట్ల జాగ్రత్తగా ఉండాల్సిందే. ఇలా మార్కెట్లు ఆకర్షణీయంగా ఉన్నప్పుడు చాలామంద తమ రిజర్వ్‌ ఫండ్స్‌ను మార్కెట్లలోకి మళ్లిస్తుంటారు. మరికొందరు ఏకంగా అప్పులు చేసి ఆ సొమ్ముతో మార్కెట్‌లో ఏదే సాధించేద్దామని ప్రయత్నించి నష్టపోతారు. కాబట్టి ఇలాంటి పనులు చేయవద్దన్నది నిపుణుల సూచన.
(ఈ కథనం కేవలం ఓ అవగాహన కోసం మాకున్న అవగాహనతో రాసింది. ఇందులోని విషయాన్ని ఫాలో కావాలా వద్దా అన్నది మీ విచక్షణ మేరకు నిర్ణయం తీసుకోండి)
