డిజిటల్ అరెస్ట్….ఆ లేడీ నుంచి 32కోట్లు కొట్టేశారు…!
చదువుకున్న వారికీ అర్థం కావట్లేదా..?
Digital Arrest : డిజిటల్ అరెస్ట్… ప్రజంట్ బాగా వినిపిస్తున్న పదం… మోసగాళ్లకు ఓ వరం… విచిత్రమేమిటంటే చదువుకోని వారికంటే ఎక్కువగా చదువుకున్న వారే దీనికి బాధితులుగా మారుతున్నారు. ఇలా నేరాలు జరుగుతున్నాయని తెలిసీ కూడా మోసగాళ్లబారిన పడి మొత్తం కోల్పోతున్నారు. కోట్లు చదివించుకుంటున్నారు. అదేంటో కానీ సీబీఐ అనగానే గుండె బేజారెత్తిపోతున్నారు…
బెంగళూరులో ఉమారాణి అనే 57ఏళ్ల మహిళనుంచి ఏకంగా 32కోట్లు కొట్టేశారు. అదికూడా ఒకరోజులో కాదు రెండ్రోజుల్లో కాదు… దాదాపు ఆరునెలల్లో… మీరు డిజిటల్ అరెస్టయ్యారు అని ఆమెను బెదిరించి దాదాపు ఆరునెలల పాటు ఆమె ఎక్కడికీ వెళ్లకుండా అడ్డుకున్నారు. మీరు ఎవరితో ఏం మాట్లాడకూడదని బెదిరించారు. వీడియో సర్వెలెన్స్‌లో ఉన్నారని చెప్పి బెంబెలెత్తించారు. ఇక ఆమెను బెదిరించి మొత్తం 187 బ్యాంక్ ట్రాన్స్‌ఫర్లు చేయించారు. అలాగని ఆ మహిళ చదువులేని వ్యక్తి కాదు… సీనియర్‌ ఐటీ ఉద్యోగిని… ఎంతో ప్రపంచాన్ని చూసింది.
ఈ స్కామ్ ఎప్పుడు మొదలైంది?
2024లో ఈ స్కామ్ మొదలైంది. ముందుగా తాము DHL కంపెనీ నుంచి మాట్లాడుతున్నామని… ఆమెకు వచ్చిన పార్సిల్‌లో మూడు క్రెడిట్‌ కార్డులు, నాలుగు పాస్‌పోర్టులు, నిషేధిత MDMA డ్రగ్స్‌ ఉన్నాయని ఓ వ్యక్తి ఫోన్ చేశాడు. ఆమె తనకు సంబంధం లేదని చెప్పినా వినలేదు… ఇది సైబర్ క్రైమ్‌ అంటూ బెదిరించారు. ఆ తర్వాత కాల్‌ను సీబీఐ అధికారికి ట్రాన్స్‌ఫర్‌ చేస్తున్నట్లు చెప్పాడు. ఇక అక్కడ్నుంచి ఆమెను పలురకాలుగా బెదిరించారు. పోలీసులకు చెబితే కేసు మరింత పెద్దదవుతుందని కుటుంబం మొత్తాన్ని జైల్లో పెడతారని హెచ్చరించారు. ఆమె కొడుకు పెళ్లి కూడా ఉండటంతో అది ఎక్కడ చెడిపోతుందోనని ఆమె భయపడింది. ఆరునెలల పాటు స్కైప్‌ కాల్స్‌ ఆన్‌లోనే ఉన్నాయి. ఆ మహిళ తన ఫిక్స్‌డ్‌ డిపాజిట్లు విత్‌డ్రా చేసింది. ఇతర సేవింగ్స్‌ ఊడ్చేసింది. అన్నీ సైబర్ నేరగాళ్లకు పంపింది. ఆ ఒత్తిడిలో ఆమె నెలరోజుల పాటు మందులు వాడాల్సి వచ్చింది. ప్రాసెసింగ్ పూర్తయ్యాక డబ్బులు వెనక్కు పంపిస్తామన్న కేటుగాళ్లు తర్వాత ఫోన్ స్విచ్చాఫ్‌ చేశారు. ఈ జూన్‌లో కొడుకు పెళ్లయ్యాక ఆమె పోలీసులను ఆశ్రయించారు.
ఇలాంటి వాళ్లు చాలామందే ఉన్నారు. హీరో నాగార్జున కుటుంబంలోని ఒకరిని కూడా ఇలాగే డిజిటల్ అరెస్ట్ పేరుతో బెదిరించారు. టీడీపీ ఎమ్మెల్యే పుట్టా సుధాకర్‌యాదవ్‌ను కూడా బెదిరించి కోటి 70లక్షలు లాగేశారు.
విచిత్రమేమిటంటే ఇలా డిజిటల్ అరెస్ట్ పేరుతో మోసాలు జరుగుతున్నాయని చదువుకున్న వారికి తెలుసు… రోజూ ఇలాంటి నేరాల గురించి మీడియాలో వింటూనే ఉన్నారు. చూస్తూనే ఉన్నారు. కానీ తమ దగ్గరకు వచ్చేసరికి భయపడిపోతున్నారు. అది మోసం అని అర్ధం చేసుకోలేకపోతున్నారు. తీరా ఉన్నదంతా వదిలించుకున్నాక కానీ వారికి తాము మునిగిపోయామని అర్థం కావడం లేదు.. చదువుకోని వారికంటే ఇలా డిజిటల్ అరెస్ట్ అనేది లేదని తెలియదు. కానీ చదువుకున్నవారికి తెలుసు కదా…? నిజంగా డ్రగ్స్‌ దొరికితే ఇలా ఫోన్‌లో బెదిరిస్తారా…? వెంటనే అదుపులోకి తీసుకుంటారు కదా…? అసలు సీబీఐ ఇలాంటి కేసులు డీల్‌ చేస్తుందా…? సీబీఐ ఎక్కడైనా, ఎప్పుడైనా అసలు డబ్బులు డిమాండ్ చేస్తుందా…? ఇలాంటి అనుమానాలేవీ వారికి రావా…?
ఇంతకీ డిజిటల్ అరెస్ట్ మోసాలు ఎలా జరుగుతాయి…?
- * ED, CBI, RAW, ఢిల్లీ పోలీస్‌, ఇన్‌కం ట్యాక్స్‌… ఇలా ఏదో ఓ పేరు చెప్పి ఎవరో ఒకరు ఫోన్ చేస్తారు
- * మీ పేరుపై పార్సిల్ వచ్చిందనో, మీ పేరుతో డ్రగ్స్‌ బుక్ అయ్యాయనో… మరోటో చెప్పి బెదిరిస్తారు
- * అరెస్ట్ వారెంట్ జారీ అయ్యిందని, డిజిటల్ అరెస్ట్ చేశామని చెబుతారు.. జైలుకు వెళ్లాల్సి వస్తుందని బెదిరిస్తారు
- * వీడియో కాల్‌ ఆన్‌ చేయమంటారు… పోలీస్‌ స్టేషన్‌లో ఉన్నట్లే అంతా ఉంటుంది
- * యూనిఫామ్‌లో ఉన్న ఓ అధికారి లైన్‌లోకి వచ్చి బెదిరింపులకు దిగుతాడు
- * పోలీసులకు చెబితే మొదటికే మోసం వస్తుందని… జైలుకు వెళతారని హెచ్చరిస్తారు
- * ఎవరితోనూ మాట్లాడకూడదంటారు…
- * స్కైప్‌ కాల్స్‌ చేయించి నిరంతరం వీడియో పర్యవేక్షణలో ఉంచుతారు.
- * డబ్బు కోసం డిమాండ్ చేస్తారు…. ఆ ఖర్చులు ఈ ఖర్చులు అని చెబుతారు
- * డబ్బు తిరిగి వస్తుందని నమ్మిస్తారు
- * సోషల్‌ మీడియా యాక్టివిస్టులనైతే కాపీరైట్ ఉల్లంఘన అని బెదిరిస్తారు
- * మీపై ఎవరో ఢిల్లీలోనో, ముంబయిలోనో కంప్లయింట్ చేశారంటారు… లాయర్‌తో మాట్లాడమంటారు
మనల్ని మనం ఎలా రక్షించుకోవాలి….?
అసలు చట్టంలో డిజిటల్ అరెస్ట్ అన్నది లేదు. ఏ మాత్రం అనుమానం వచ్చినా పోలీసులకు సమాచారం ఇవ్వాలి. వ్యక్తిగత వివరాలు ఎట్టి పరిస్థితుల్లోనూ ఇవ్వకూడదు. ఆధార్, బ్యాంక్ నెంబర్ల వంటివి చెప్పకండి. ఓటీపీల వంటివి షేర్ చేయవద్దు. వెంటనే సైబర్ క్రైమ్‌ 1930కి ఫిర్యాదు చేయండి. వారు పంపే ఈ మెయిల్స్‌ ఓపెన్ చేయకండి. మెసేజ్‌లు పట్టించుకోవద్దు… డిజిటల్ అరెస్ట్ అనగానే భయపడొద్దు. తప్పు చేస్తే పోలీసులు లేదా సీబీఐ లేదా మరేదైనా దర్యాప్తు సంస్థ నేరుగా అదుపులోకి తీసుకుంటుంది. కానీ ఇలా డిజిటల్ అరెస్ట్ అని చెప్పదు. అసలు మిమ్మల్ని డబ్బులు ఎప్పుడూ డిమాండ్ చేయదు. డబ్బులు డిమాండ్ చేశారంటే దాని అర్థం వాళ్లు మోసగాళ్లనే.. వెంటనే పోలీసులను ఆశ్రయిస్తే మంచిది.
డబ్బు ఊరికే రాదు… కాబట్టి దాన్ని ఊరికే పొగొట్టకండి.
